Vinnuskóli sumarið 2020

Atvinnu- og menningarmálanefnd þakkar Svölu Norðdahl fyrir innsent erindi. Nefndinni þykir hugmyndin mjög góð og telur að hún hafi mikið forvarnargildi á þessum fordæmalausu tímum. Það lítur út fyrir að þessi aldurshópur gæti orðið atvinnulaus í sumar. Nefndin leggur til að hámarksaldur vinnuskólans í Rangárþingi ytra verði hækkaður um 2 ár, þ.e. úr árgangi 2004 í 2002. Einnig að tryggt verði að nemendur útskrifaðir úr 7. bekk, þ.e. árgangur 2007, geti sótt um í vinnuskólanum eins og verið hefur undanfarin ár. Nefndin telur að auka þyrfti fjármagn töluvert fyrir vinnuskólann svo að verkefnið gæti orðið að veruleika í ár. Óskað er eftir að sveitarstjórn taki það fyrir hjá sér og setji fjármagn í verkefnið og beri þannig hagsmuni þessa hóps í huga. Nefndin hvetur sveitarstjórn að kynna málið fyrir öðrum nefndum sem gætu tekið þátt í framkvæmdinni. Vonast er eftir flýtimeðferð svo að verkefnið komist í framkvæmd í sumar.

Lagt fram minnisblað um fyrirkomulag vinnuskóla sumarið 2020. Auglýst verður að vinnuskólinn sé opinn ungmennum til 18 ára aldurs - þegar ljóst verður hver ásóknin er þá þarf að gera ráðstafanir með fjármögnun. Verið er að safna í sarpinn fjölbreyttum verkefnum sem hægt væri að láta unga fólkið gera í sumar. Þar eru ýmis umhirðuverkefni eins og venja er en einnig einfaldari viðhaldsverkefni sem snúa að fasteignum, trjáplöntun ofl. Þá er verið að huga að verkefnum sem snúa að skapandi greinum til að lífga upp á samfélagið í sumar. Vel hefur gengið að ráða verkstjóra og þar hefur m.a. verið litið til verkstjórnar í fjölbreyttari verkefnum. Þegar liggur fyrir hver þátttakan er verður undirbúinn viðauki við fjárhagsáætlun ársins.

Samþykkt samhljóða að auglýsa störf við vinnuskólann á þessum forsendum.