Leirubakki. Deiliskipulag frístundalóða

Skipulagsnefnd telur að tiltekið ákvæði í kafla 2.2.2 í greinargerð aðalskipulags Rangárþings ytra 2016-2028 sem óskað er breytingar á sé haldið miklum annmörkum og geti hindrað eðlilega uppbyggingu á skilgreindum frístundasvæðum í sveitarfélaginu. Algengt er að hver kaupandi kaupi nokkrar lóðir saman og því óljóst hvort eða hvenær verði byggt á þeim öllum. Nefndin leggur til við sveitarstjórn að breyta eigi orðalagi viðkomandi ákvæðis þar sem orðin "hafa verið byggðir" verði felld út og orðin "hefur verið ráðstafað" sett í staðinn. Engar aðrar breytingar verði gerðar á viðkomandi ákvæði. Nefndin telur þessa breytingu minni háttar og leggur til að farið verði um málsmeðferð eins og um óverulega breytingu á aðalskipulaginu sé að ræða.
Jafnframt leggur nefndin til að landeiganda verði heimilt að leggja fram nýtt deiliskipulag af tilteknu svæði í samræmi við fram lögð gögn, þegar fyrir liggur staðfesting á að 2/3 hlutar svæðisins hafi verið seldir eða ráðstafað. Nefndin telur þó ekki ákjósanlegt að tengja viðkomandi svæði við núverandi frístundasvæði Fjallalands, heldur skuli reynt að haga aðgengi þannig að svæðin verði aðskilin eins og kostur er. Nefndin leggur til að fallið verði frá kynningu lýsingar þar sem skipulagsáætlun samræmist stefnu aðalskipulagsins hvað varðar landnotkun.

Skipulagsnefnd samþykkir tillöguna og leggur til að hún verði auglýst skv. 41. gr. skipulagslaga nr. 123/2010.

Skipulagsnefnd fjallaði um framkomnar athugasemdir og ábendingar. Nefndin telur að búið sé að bregðast við öllum framkomnum athugasemdum í uppfærðri greinargerð og leggur til að tillagan verði send Skipulagsstofnun til afgreiðslu.