Kynning á brennslustöðvum - Sorporka ehf.

Fulltrúar Sorporku ehf. kynntu nýjar lausnir í sorpbrennslumálum. Stjórn SOR hefur áhuga að skoða málið áfram.

Farið er yfir vettvangsferð til Ferro power í Finnlandi þar sem fulltrúar úr Rangárþingi skoðuðu sorpbrennslustöð sem væri hentug stærð fyrir Sorpstöð Rangárvallasýslu b.s. Ferðin var upplýsandi og áhugaverð. Stjórn lýsir áhuga á að skoða verkefnið áfram og kynna sér þær leiðir sem í boði eru. Fyrirliggja tvö minnisblöð vegna ferðarinnar frá fulltrúum Sorpu b.s og Antoni Kára formanni stjórnar Sorpstöðvar Suðurlands. Framkvæmdastjóra er falið að kalla eftir frekari upplýsingum frá Sorporku um þá möguleika sem eru í boði og leggja fyrir stjórn á næsta fundi.

Framkvæmdastjóri óskar eftir að bóka vegna málsins:
Framkvæmdastjóri lýsir vonbrigðum sínum með að stjórn Sorpstöðvarinnar hafi ekki séð sér fært að greiða fyrir skoðunarferðina fyrir hann, heldur hafi hann þurft að greiða ferðina sjálfur. Það er mikilvægt til að viðhalda framþróun og þekkingu og kynna sér þær lausnir sem í boði eru til að viðhalda eðlilegri þekkingu og framþróun í vinnslu á úrgangi.

Lögð fram drög að viljayfirlýsingu um samstarf milli Sorpstöðvar Rangárvallasýslu b.s og Sorporku ehf. um að koma upp 1MW sorporkustöð í gámum á athafnasvæði Sorpstöðvarinnar á Strönd.

Stjórn felur framkvæmdastjóra að taka saman áætlaðan kostnað Sorpstöðvar Rangárvallasýslu bs. við að uppfylla sinn þátt í undirbúningi, uppsetningu og rekstri á sorpbrennslustöðinni sem fram kemur í viljayfirlýsingunni og leggja fram á næsta fundi stjórnar. Þá er framkvæmdastjóra jafnframt falið að láta lögmann rýna efni viljayfirlýsingarinnar.

Í viljayfirlýsingunni felst að Sorporka ehf fær vilyrði fyrir því að hefja vinnu við að koma upp allt að 2.500 tonna brennslustöð fyrir blandaðan úrgang á Strönd. Yfirlýsingin gerir ráð fyrir að Sorporka ehf sjái um stofnkostnað og viðhald en SOR um daglegan rekstur. Fjárhagsleg ábyrgð SOR snýr að uppbyggingu innviða og aðstöðusköpun á Strönd. Ef samningar milli aðila að þessari viljayfirlýsingu hafi ekki tekist fyrir lok ársins 2024 fellur hún úr gildi.

Stjórn samþykkir fyrirliggjandi viljayfirlýsingu og felur framkvæmdastjóra að undirrita hana.

Stjórn samþykkir fyrirliggjandi ósk um framlengingu á viljayfirlýsingu milli Sorporku ehf og Sorpstöðvar Rangárvallasýslu b.s vegna sorpbrennslustöðvar á Strönd.

Framkvæmdastjóri fór yfir stöðu máls varðandi áform Sorporku ehf um brennslustöð á Strönd. Lagt til að framlengja viljayfirlýsingu Sorpstöðvar Rangárvallasýslu við Sorporku ehf til 1. september 2025. Jafnframt kallar stjórn eftir því að Sorporka leggi fram frekari gögn og drög að samningum um verkefnið.

Samþykkt samhljóða.

Lögð fram til kynningar drög að þjónustusamningi, útboðsskilmálum og auglýsingu í tengslum við viljayfirlýsingu Sorstöðvarinnar og Sorporku ehf.

Málinu frestað til næsta fundar stjórnar.

Stjórn samþykkir drög að auglýsingu vegna þjónustusamnings til brennslu á 2500 tonnum/ári á Strönd af óendurnýtanlegum úrgangi frá heimilum, fyrirtækjum og iðnaði á starfssvæðinu með þeim fyrirvörum að skipulag, umhverfismat og starfsleyfi á Strönd verði samþykkt.

Samþykkt samhljóða.

Auglýsing og útboðsskilmálar lagðir fram til kynningar.

Lögð fram niðurstaða auglýsingar þar sem óskað var eftir tilboðum til að gera þjónustusamning við SOR um brennslu á allt að 2500 tonnum af óendurnýtanlegum úrgangi. Tilboðsfrestur rann út þann 15. júlí s.l.

Eitt tilboð barst frá Sorporku ehf og drög að þjónustusamningi.

Stjórn tekur jákvætt í málið og ákveður að skoða niðurstöðu tilboðsins nánar með tilliti til hagsmuna SOR til framtíðar og felur stjórnarformanni að vinna málið áfram.

Samþykkt samhljóða.

Á fundinn mæta Stefán Guðsteinsson og Ármann Kr. Ólafsson frá Sorporku og Stefán Gíslason frá Environice til að fara yfir mögulegar útfærslur á uppröðun brennslulínu o.fl.

Jafnframt er lögð fram drög að þjónustusamningi með athugasemdum sem SOR þyrfti að skoða í tengslum við verkefnið.

Stjórn þakkar fyrir góða kynningu.

Farið var yfir stöðu á málum varðandi erindi Sorporku ehf um brennslustöð á Strönd.

Stjórn telur vegna umfangs verkefnisins og fjölda annarra verkefna SOR ekki tímabært að taka ákvörðun í málinu að svo stöddu. Stjórn samþykkir að fela framkvæmdastjóra að útbúa minnisblað til að meta kosti og galla við uppsetningu á brennslustöð á Strönd m.t.t hagsmuna SOR.