Markaðs-, menningar- og jafnréttismálanefnd

Markaðs- og kynningarfulltrúi fer yfir drög að skipulagi Töðugjalda.
Dagskrá er í vinnslu.
Nefndin leggur til að fjölskyldudagskrá laugardagsins verði haldin í íþróttahúsinu á Hellu og svæðinu þar í kring og að kvöldvakan verði haldin á Gaddstaðaflötum.
Markaðs- og kynningarfulltrúa falið að ræða við landeigendur og umsjónaraðila Gaddstaðaflata um möguleika á slíku.

Kortin voru síðast uppfærð 2022. Haft var samband við aðilana sem voru skráðir á kortið og það uppfært samkvæmt upplýsingum frá þeim. Einnig var auglýst eftir uppfærslum og ábendingum á heimasíðu sveitarfélagsins, Facebook-síðu þess, Facebook-síðu ferðaþjónustuaðila á svæðinu og íbúasíðum.
Stefnt er að uppfærðri útgáfu með vorinu.

Úthlutanir úr menningarsjóði verða tvær árið 2026; ein að vori og ein að hausti.
Opið verður fyrir umsóknir í fyrri úthlutun frá 1. mars til 1. apríl og í seinni úthlutun frá 1. september til 1. október samkvæmt reglum sjóðsins.
Til úthlutunar í ár eru kr. 2.000.000 og verður helmingi úthlutað í fyrri úthlutun og helmingi í seinni úthlutun.
Nefndin hvetur fólk til að kynna sér reglurnar vel og vanda umsóknir. Minnt er á að hægt er að fá gjaldfrjálsa ráðgjöf hjá sveitarfélaginu við vinnslu umsókna. Hægt er að senda fyrirspurnir á ry@ry.is eða hringja í síma 4887000 á opnunartíma skrifstofu.

Fyrr á árinu kom hugmynd frá SASS um að sveitarfélög á Suðurlandi töluðu sig saman um að halda barnamenningarhátíð eða barnamenningardaga á vordögum 2026. Áherslan er á samstarf, samnýtingu hugmynda og að skapa sýnileika fyrir barnamenningu á Suðurlandi í heild, án þess að leggja óhóflegt álag á einstök sveitarfélög.
Ætlunin er að taka þátt með viðburðum á sumardaginn fyrsta og að í framhaldinu verði skoðað hvort hægt sé að bæta í á næsta ári með meiri dagskrá.

Fjölmenningarhátíðin verður haldin í íþróttahúsinu á Hellu og hvetur nefndin fólk til að fjölmenna. Á hátíðinni býðst fólki að kynna menningu sinnar upprunaþjóðar og er viðburðurinn frábært tækifæri til að hittast, spjalla, njóta og fræðast.

Víkingurinn er keppni sterkustu manna landsins og fer fram dagana 24.?26. júlí 2026. Keppnin fer fram í 4 sveitarfélögum og henni er sjónvarpað á RÚV.
Forsvarsmenn keppninnar óska eftir gistiaðstöðu, einni máltíð og styrk upp á kr. 250.000.
Nefndin tekur vel í beiðnina og samþykkir fyrir sitt leyti að taka á móti þeim en óskar jafnframt eftir því, ef af verður, að myndskeið úr sveitarfélaginu fylgi útsendu efni. Nefndin getur aðstoðað við að finna hentuga staði til upptöku eða jafnvel útvegað myndefni að hluta til.