Skipulags- og umferðarnefnd Rangárþings ytra

Landeigendur óskar eftir að fá að skipta úr landi sínu, Ægissíðu 1 landspildu A, tveimur lóðum. Önnur lóðin yrði 9.122,1 m² að stærð, fengi heitið Skuggasíða og Lxxxxxx og hin lóðin yrði 9.354,7 m að stærð, fengi heitið Spóabreiða og Lxxxxxx í samræmi við merkjalýsingu frá Jóhönnu Sigurjónsdóttur dags. 11.11.2024. Engar breytingar verða gerðar á landnotkun lóðanna. Óskað er eftir því að heiti lóðarinnar Ægissíðu 1 landspildu A breytist samhliða og verði Birkiholt. Birkiholt verði 8.853,3 m² að stærð.

Landeigandi óskar eftir að fá að skipta úr landi sínu, Hrafnaþingi L233392, lóð sem yrði 19,3 ha að stærð, fengi heitið Móholt 4 og Lxxxxxx í samræmi við merkjalýsingu frá Kristjönu Ólöfu Valgeirsdóttur dags. 30.10.2024. Hrafnaþing er nú þegar tvær spildur og er afmörkun þegar þekkt. Hrafnaþing var skráð 20,3 ha fyrir skiptin en verður 10.000,1 m² eftir skiptin. Engar breytingar verða gerðar á landnotkun lóðanna.

Landeigandi óskar eftir að fá að skipta úr landi sínu, Hrafntóftum 3 L233391, lóð sem yrði 14,5 ha að stærð, fengi heitið Móholt 3 og Lxxxxxx í samræmi við merkjalýsingu frá Kristjönu Ólöfu Valgeirsdóttur dags. 30.10.2024. Hrafntóftir 3 er nú þegar tvær spildur og er afmörkun þegar þekkt. Hrafntóftir 3 var skráð 16,9 ha fyrir skiptin en verður 24.365,9 m² eftir skiptin. Engar breytingar verða gerðar á landnotkun lóðanna.

Landeigandi óskar eftir að fá að skipta úr landi sínu, Hrafnhólma L233390, lóð sem yrði 14,7 ha að stærð, fengi heitið Móholt 2 og Lxxxxxx í samræmi við merkjalýsingu frá Kristjönu Ólöfu Valgeirsdóttur dags. 30.10.2024. Hrafnhólmi er nú þegar tvær spildur og er afmörkun þegar þekkt. Hrafnhólmi var skráð 22,1 ha fyrir skiptin en verður 75.213,2 m² eftir skiptin. Engar breytingar verða gerðar á landnotkun lóðanna.

Hugmyndasamkeppni um götuheiti í Bjargshverfi. Heimilt var að skila inn tillögum til og með 19. nóvember og bárust tillögur frá alls 28 aðilum.

Farið yfir úthlutunarreglur lóða

Farið yfir erindisbréf nefndarinnar

Landeigandi óskar eftir að breyting verði gerð á landnotkun jarðar sinnar, Hallstúns L190888, þar sem núverandi frístundabyggð minnkar um 4,4 ha en landbúnaður stækkar til sama vegar. Jafnframt er óskað eftir heimild til breytingar á gildandi deiliskipulagi fyrir svæðið frá árinu 2021. Þær 7 frístundalóðir sem nú eru til staðar haldast óbreyttar. Á syðstu lóðinni (15,9ha) er gert ráð fyrir tveimur íbúðarhúsum, heild samtals um 400m² með bílskúr og að auki verði byggð landbúnaðartengd hús, svo sem skemma og útihús.

Eigandi Hallstúns spildu L203254 óskar eftir að fá að leggja fram deiliskipulag af lóð sinni samhliða breytingum á landnotkun í aðalskipulagi sveitarfélagsins, þar sem núverandi landnotkun landbúnaðarsvæðis verði breytt í Verslunar- og þjónustunot. Fyrirhuguð er uppbygging ferðaþjónustu fyrir allt að 20 gesti. Lýsing skipulagsáforma var í kynningu til og með 28.11.2024 og bárust umsagnir frá eftirtöldum aðilum:

Frá Mílu og Veitum sem gerðu engar athugasemdir en óskuðu samráðs við framkvæmdir á svæðinu; frá Umhverfisstofnun sem bendir á að setja þurfi fram stefnu sveitarfélagsins um vatnamál og fuglalíf; frá Vegagerðinni þar sem gerð er krafa um að notuð verði sama tenging frá Hagaveginum og að Giljanesi; og Heilbrgðiseftirliti Suðurlands sem gerði engar athugasemdir og frá Skipulagsstofnun sem telur lýsinguna veita góða mynd af viðfangsefni fyrirliggjandi skipulagsáforma.

Lögð er fram tillaga frá Eflu dags. 20.12.2024.

Rangárþing ytra vinnur að breytingu á Aðalskipulagi Rangárþings ytra 2016-2028, skv. 1. mgr. 36. gr. skipulagslaga nr. 123/2010. Breytingin nær til Stekkatúns 1 (landnr. 165446) sem er 44 ha að stærð skv. skrá HMS. Hluti lands er skilgreindur sem verslunar- og þjónustusvæði VÞ36 í gildandi aðalskipulagi. Fyrstu hugmyndir gerðu ráð fyrir að stækka verslunar- og þjónustusvæði VÞ36 úr 6,7 ha í 44 ha. Megin uppbygging yrðu gestahús/litlar hvelfingar þar sem gestir geti notið næturhimins og norðurljósa, ásamt góðri gistiþjónustu. Hámarks byggingarmagn innan þjónustusvæðis hefði aukist úr 510 m2 yfir í allt að 1600 m2 innan svæðis. Lýsing skipulagsáforma hefur verið kynnt og var frestur til athugasemda til og með 28.11.2024. Nokkrar athugasemdir bárust á kynningartíma lýsingarinnar sem gerðu það að verkum að umsækjendur hafa nú minnkað áform sín niður í að Verslunar- og þjónustusvæðið verður 12,6 ha í stað 44 ha áður, að hámarksfjöldi gesta verði allt að 54 í allt að 27 litlum gestahúsum / hvelfingum í stað 55 áður. Lögð er fram uppfærð greinargerð frá Eflu dags. 17.12.2024.

Rangárþing ytra hefur samþykkt að stækkað verði verslunar og þjónustusvæðið VÞ23. Gert er ráð fyrir stækkun núverandi hótelbyggingar í allt að 5000m2, á allt að 3 hæðum. Innan verslunar og þjónustusvæðisins verður einnig gert ráð fyrir hreinlegri iðnaðarstarfsemi eins og verið hefur. Fyrirhugað er að heimila stækkun núverandi aðstöðu í allt 1500 m2. Heimiluð verði föst búsetu innan svæðis í allt 20 litlum íbúðum í rað- og/eða parhúsum. Gert verður ráð fyrir nýju íbúðarsvæði með allt að 3 íbúðarhúsalóðum á L219861 Norður Nýibær lóð. Tillaga að breytingu á aðalskipulagi bíður staðfestingar hjá Skipulagsstofnun. Deiliskipulagstillagan var auglýst frá og með 9.10.2024 til og með 27.11.2024. Lögð er fram samantekt á athugasemdum og ábendingum sem bárust og lögð fram drög að viðbrögðum við þeim. Uppfærð tillaga frá Eflu dags. 10.12.2024 lögð fram.

Ferðafélag Íslands óskar eftir að fá að leggja fram tillögu að breytingum á gildandi deiliskipulagi dags. 26.5.2010. Breytingin felst í breyttum lóðamörkum, þar sem lóð er stækkuð og gert er ráð fyrir einni lóð ásamt byggingarreit um núverandi byggingar á svæðinu. Tillaga var auglýst frá og með 9.10.2024 til og með 27.11.2024. Umsagnir bárust frá eftirtöldum aðilum:

Frá Mílu, Veitum, Brunavörnum Rangárvallasýslu, Vegagerðinni, Landsneti, Heilbrigðiseftirliti Suðurlands og Rarik sem gerðu engar athugasemdir; frá Náttúrufræðistofnun sem gerir athugasemdir við að þær byggingar sem sýndar eru á skipulagsuppdrætti með breyttu deiliskipulagi hafi nú þegar verið reistar. Á skipulagsuppdrætti sé einnig gert ráð fyrir bílastæði en Náttúrufræðistofnun leggur til að umferð vélknúinna ökutækja að skálasvæðinu verði ekki aukin frá því sem nú er og að jafnframt þurfi að tryggja að við innviðauppbyggingu verði öllu raski haldið í lágmarki til að skerða ekki landslag, náttúruminjar og upplifun göngufólks og frá Umhverfisstofnun sem bendir á að fjalla þurfi betur um fráveitumál í ljósi aðgerða sem samþykktar og gerðar hafa verið á svæðinu, að gerð verði betur grein fyrir byggingarmagni og að hugað verði að álagsstýringu ferðamanna í tengslum við tjaldsvæðið og gistimöguleika til að koma í veg fyrir að innviðir svæðisins bregðist ekki.

Landeigandi Bjálmholts L165072 hefur lagt fram tillögu að deiliskipulagi úr jörð sinni. Um er að ræða uppbyggingu á þjónustuhúsi sem ætluð er vegna kynningar og sölu á afurðum býlisins. Tillagan var auglýst frá og með 11.4.2024 til og með 23.5.2024. Umsagnir sem bárust urðu til þess að gerðar voru smávæglegar breytingar á tillögunni og var ný tillaga lögð fram frá M11 dags. 28.5.2024. Að beiðni umsækjanda er hér óskað eftir að frekari breytingar verði gerðar á tillögunni, þar sem bætt verði við skilgreiningu á framleiðslu í brugghúsi, byggingarmagn verði aukið um 1000 m² og bætt verði við kjallara, byggingarreitur stækkaður, hreinsistöð staðsett innan byggingareits og texta breytt í greinargerð undir liðum 1.1 og 2.2. þessu til samræmis. Uppfærð tillaga var grenndarkynnt til nærliggjandi landeigenda og bárust engar athugasemdir.

Fossdalir ehf óska eftir framkvæmdaleyfi til gerðar fiskivegar framhjá Tungufossi í Eystri Rangá. Fyrir ofan Tungufoss er um 25km langt vatnasvæði sem býður upp á mjög góð skilyrði fyrir hrygningu og búsvæði laxfiska. Verkefnið felur í sér að opna fleiri búsvæði, sem gerir laxi kleift að komast inn á ný hrygningar- og búsvæði. Fiskvegurinn verður byggður í landi Keldna, 40 metrum ofan við Tungufoss, með inntak um 66 m yfir sjávarmáli.

Land og skógur óskar eftir leyfi Rangárþings ytra við lagningu slóða í svokölluðu Keldnahrauni til að bæta aðgengi að uppgræðslusvæðinu í Keldnagirðingunni. Umsókn barst 18.12.2024 og henni fylgdu yfirlitsuppdráttur og ljósmynd af sambærilegum slóða á svæðinu. Jafnframt fylgdu samskipti við Náttúrufræðistofnun og Umhverfisstofnun frá aðdraganda umsóknar. Yirlitsuppdrátturinn sýnir staðsetningu allra skráðra minja á svæðinu en þær upplýsingar fengust hjá Minjastofnun.