Skipulags- og umferðarnefnd

Eigandi Lýtingsstaða lands 2 óskar eftir að skipta út úr landi sínu, 23,5 ha spildu sem fengi heitið Stóristeinn og L241792. Lýtingsstaðir land 2, L220547, minnkar sem nemur útskiptri spildu og verður 34,5 ha eftir skiptin. Merkjalýsing frá Hugrúnu Hörpu Björnsdóttur, dags. 29.6.2026.

Landsvirkjun óskar eftir að sveitarstjórn Rangárþings ytra gefi út framkvæmdaleyfi til handa fyrirtækinu fyrir að setja upp búfjárræsi norðan við Landvegamót. Framkvæmdin er hluti af vegabótum á þjóðvegi nr. 1 (Hringvegur) og þjóðvegi nr. 26, Landvegur, við Landvegamót tengt framkvæmdum við vindorkuverið Vaðölduver, samkvæmt 13. gr. skipulagslaga nr. 123/2010 og 6. gr. reglugerðar um framkvæmdaleyfi nr. 772/2012 .

Fyrir hönd íbúa og landeigenda við Árbæjarveg 271, 851 Hella, er óskað eftir því að hámarkshraði á Árbæjarvegi verði lækkaður niður í 50 km/klst. á kaflanum frá Heiðarbrún að Þjóðvegi 1. Með erindinu fylgja undirskriftir íbúa og landeigenda á svæðinu.

Eigendur jarðarinnar Austvaðsholt 2 hafa lagt fram tillögu að deiliskipulagi fyrir hluta jarðarinnar. Í undirbúningi er bygging á nýju íbúðarhúsi á jörðinni fyrir barn eigenda og er ætlunin að skipta út landskika fyrir hann þar sem hann gæti byggt íbúðarhús,bílskúr, skemmu, gestahús, gróðurhús og etv. hús til útleigu fyrir ferðamenn í samræmi við gildandi ákvæði aðalskipulags.

Eigendur jarðarinnar ætla að búa áfram í húsi þeirra á jörðinni en vilja útbúa lóð fyrir það og geta byggt gróðurhús og skemmu ásamt gestahúsi. Tillaga var auglýst frá og með 15. maí til og með 1. júlí 2026. Umsagnir hafa borist frá alls 5 umsagnaraðilum. Vegagerðin gerði athugasemd við tengingar af Árbæjarvegi. Skoða má allar umsagnir undir máli nr. 609/2026 í skipulagsgáttinni, https://skipulagsgatt.is/issues/2026/609

Eigandi Leirubakka 2 hefur lagt ram tillögu að deiliskipulagi. Deiliskipulagið nær yfir 49.260 m2 svæði í landi Leirubakka 2 en fyrirhugað er að hafa þar 52 frístundalóðir. Heimilt er að reisa frístundahús, aukahús/gestahús og geymslu á lóðunum með nýtingarhlutfallið 0,03 þ.e. 300 m2 á hverri 10.000 m2 lóð. Lögð er fram tillaga frá Eflu dags. 29.4.2026. Tillaga var auglýst frá og með 15. maí til og með 1. júlí 2026. Umsagnir bárust frá alls 7 umsagnaraðilum. Vegagerðin gerði athugasemdir við að á vegamótum þar sem aðkomuvegur að skipulagssvæðinu og Landvegur (26 -03) mætast eru krossvegamót sem sé alls ekki ásættanlegt. Félag sumarhúsaeigenda gerir nokkrar athugasemdir og einnig Náttúruverndarstogfnun og Heilbrigðiseftirlit Suðurlands. Landsnet gerir einnig athugasemdir við að byggingarreitir skuli skilgreindir innan helgunarsvæðis háspennulínu. Skoða má allar umsagnir undir máli nr. 610/2026 í skipulagsgáttinni, https://skipulagsgatt.is/issues/2026/610

Landeigandi hefur lagt fram tillögu að deiliskipulagi fyrir land sitt, Ægissíðu 3 lóð 3. Gert verði ráð fyrir byggingu þriggja íbúðarhúsa, fimm gestahúsa, geymslu og skemmu. Tillagan var auglýst frá og með 28.5.2026 til og með 15.7.2026. Alls bárust umsagnir frá 6 umsagnaraðilum. Ekki var um beinar athugasemdir að ræða heldur frekar ábendingar til betri leiðar. Umsagnir má skoða undir máli nr. 675/2026 í skipulagsgátt.

Sveitarfélagið vinnur að gerð deiliskipulags fyrir svæðið við Sigöldugljúfur. Í deiliskipulaginu er lögð áhersla á að bæta aðstöðu og öryggi ferðamanna samhliða því að draga úr og koma í veg fyrir frekara rask á náttúrunni innan skipulagssvæðisins. Gert verði ráð fyrir lóð undir aðstöðuhús/áningarstað við framtíðarbílastæði, vinnuslóði að Krókslóni verði nýttur undir neyðarþjónustu, göngustígar gerðir út frá bílastæðinu. Gert verði ráð fyrir þremur útsýnisstöðum á barmi gljúfursins og upplýsingaskilti sett upp á svæðinu. Tillagan var auglýst frá og með 28.5.2026 til og með 15.7.2026. Umsagnir bárust frá alls 10 umsagnaraðilum en ekki var um beinar athugasemdir að ræða, heldur frekar ábendingar til betri leiðar. Umsagnir má skoða undir máli nr. 449/2026 í skipulagsgáttinni.

Eigandi lands hefur lagt fram tillögu að deiliskipulagi fyrir land sitt. Áformað er að byggja hús, geymslu/gestahús og skemmu á landinu. Áfram verður landbúnaður, eða einhvers konar ræktun. Skipulagssvæðið mun ná yfir hluta af landinu og mun aðkoman vera af vegslóða sem liggur meðfram Hólsá. Gerðir verða tveir byggingarreitir, annar fyrir allt að 150 m² hús og allt að 50 m² geymslu/gestahús og hinn byggingarreiturinn fyrir allt að 400 m² skemmu. Tillagan var auglýst frá og með 28.5.2026 til og með 15.7.2026. Skoða má umsagnir undir máli nr. 677/2026 í skipulagsgátt. Umsagnir bárust frá alls 7 umsagnaraðilum en ekki var um beinar athugasemdir að ræða, heldur frekar ábendingar til betri leiðar.

Við afgreiðslu byggingarleyfismála hjá byggingarfulltrúa kom í ljós að breytt aðkoma gegnum lóðina Höfuðból 201 að lóð 203 væri ekki í samræmi við gildandi deiliskipulag. Þinglýst samkomulag við eiganda lóðar nr. 201 liggur fyrir.

Landeigendur óska eftir að fá að breyta gildandi deiliskipulagi dags. 13.11.2013 m.s.br. Verið er að breyta afmörkun milli lóða Hekluskarðs 1 og 2 svo lóðarmörk liggi betur í landinu og færist aðkoma að Hekluskarði 2 til norðvesturs. Við þetta stækkar lóð Hekluskarðs 1 úr 14,55ha í 15,74ha og lóð Hekluskarðs 2 minnkar úr 4,85 ha í 3,66 ha. Skilmálar fyrir minni lóð Hekluskarðs 2 eru óbreyttir. Hnitaskrá einnig uppfærð til samræmis

Lóðarhafi Rangárbakka 8a, 8b og 8c hefur lagt fram tillögu að breytingu á gildandi deiliskipulagi fyrir svæðið, dags. 11.10.2012. Fyrir á svæðinu eru þjónustuhús á einni hæð og lítið geymsluhús á reit E. Á reit B eru tvö salernishús ásamt 6 litlum gistihúsum á einni hæð. Á reit C eru 4 lítil gistihús á einni hæð. Deiliskipulagsbreytingin nær til verslunar og þjónustulóðar Árhús. Á landinu eru í dag skráðar 3 lóðir L164952, L221343 og L221344. Breytingin felur í sér að hætt verið við byggingu gistihúss ásamt tengibyggingu á reit E. Fjölgun verði á gistihúsum á reit A og reit D ásamt nýju salernihúsi á reit G. Byggt verður starfsmannahús á einni hæð sem kemur á reit F. Byggt verður nýtt hótel á reit E og nýtt lúxushótel á reit I. Á reit H verður byggt baðlón. Tillagan var auglýst frá og með 28.5.2026 til og með 15.7.2026. Umsagnir bárust frá alls 7 umsagnaraðilum. Umsagnir má skoða undir máli nr. 443/2025 í skipulagsgáttinni.

Byggingarfulltrúi Rangárþings ytra hefur móttekið umsókn Kristjáns Andréssonar, fh. Húsaneshesta ehf., um byggingarheimild til byggingar 568,8 m² hesthúss úr steinsteypu, sem skipt er upp í fimm rými, samkvæmt aðaluppdráttum Torfabæjar ehf., dags. 30.6.2026. Afgreiðslu málsins er frestað og því vísað til skipulags- og umferðarnefndar til frekari umfjöllunar og afgreiðslu, þar sem stærð rýmis 010101 fer umfram þær stærðarheimildir sem fram koma í gildandi deiliskipulagi. Samkvæmt skilmálum deiliskipulags er gert ráð fyrir rýmum á bilinu 10-15m að lengd.

Byggingarfulltrúi Rangárþings ytra hefur móttekið umsókn Guðmundar Hjaltasonar, fh. Sæmundar B. Ágústssonar, um byggingarheimild til byggingar 3.706,6 m² fjóss á jörðinni Bjólu, samkvæmt meðfylgjandi aðaluppdráttum Eflu, dags. 1.7.2026.

Málinu er vísað til skipulags- og umferðarnefndar til umfjöllunar og afgreiðslu, þar sem deiliskipulag liggur ekki fyrir á svæðinu.

Að mati byggingarfulltrúa er um að ræða umfangsmikið og tæknilega flókið búrekstrarmannvirki, alls 3.706,6 m² að stærð, með mjólkurhúsi, kanalkerfi, fóðrunarkerfi, gjafaróbotum og fjórum mjaltaróbotum. Með hliðsjón af stærð, flækjustigi og þeim tæknikerfum sem mannvirkið inniheldur telst það falla í umfangsflokk 2 samkvæmt byggingarreglugerð og er því byggingarleyfisskylt.

Byggingarfulltrúi Rangárþings ytra hefur móttekið umsókn Guðmundar Hjaltasonar hjá Eflu, fh. Félagsbúið Saurbær, um byggingarheimild til byggingar 954,2 m² fjóss á jörðinni Saurbæ (L165155), samkvæmt aðaluppdráttum Eflu, dags. 6.7.2026.
Málinu er vísað til skipulags- og umferðarnefndar til umfjöllunar og afgreiðslu, þar sem deiliskipulag liggur ekki fyrir á svæðinu.

Byggingarfulltrúi Rangárþings ytra hefur móttekið umsókn Hlyns Axelssonar, fh. Lyngáss 13 ehf., um byggingarleyfi fyrir 1.531,2 m² framleiðslu- og þjónustubyggingu í Bjálmholti, samkvæmt aðaluppdráttum HAX arkitekta, dags. 26.6.2026. Við yfirferð á afgreiðslufundi byggingarfulltrúa var afgreiðslu frestað og málinu vísað til skipulags- og umferðarnefndar þar sem hæð mannvirkis og heildarstærð fara umfram heimildir í gildandi deiliskipulagi.

Nesbúegg ehf. hefur fengið heimild Rangárþings ytra til að hefja vinnu við gerð nýs deiliskipulags eða breytingu á gildandi deiliskipulagi fyrir jörðina Læk í holtum, eftir því sem sveitarfélagið telur réttast út frá skipulagslegri stöðu svæðisins. Á jörðinni eru í dag tvö varphús, hvort um sig fyrir um 12.500 varphænur, eða samtals um 25.000 fugla. Breytingin sem sótt er um felur í sér að fjölga varpfuglum í allt að 40.000 fugla (fjölgun um 15.000 fugla) og mannvirkjum því tengdu.

Skipulagsgögn frá ÚG Bygg ehf, dags. í júlí 2026.

Skipulags- og umferðarnefnd hefur farið yfir gögn málsins þar sem Skeiða- og Gnúpverjahreppur leggur áherslu á að skýra betur samræmi aðalskipulags og deiliskipulags varðandi heimildir til efnistöku úr lónstæði. Tillaga hefur því verið uppfærð, þar sem náma 26 er afmörkuð og samhliða er sett inn breytt afmörkun lóðar fyrir tengivirki Landsnets auk ýmissa smábreytinga. Þar sem auglýsing á breytingu á deiliskipulagi Hvammsvirkjunar er lokið af hálfu Rangárþings ytra en án ofangreindra atriða telur nefndin réttast að tillaga verði auglýst að nýju.

Lóðarhafar leggja fram tillögu að deiliskipulagi fyrir lóðir sínar. Lóðirnar eru samliggjandi, samtals 12,6 ha að stærð, en afmörkun deiliskipulagsins nær til um 10,5 ha svæðis innan þeirra. Svæðið er skilgreint sem verslunar- og þjónustusvæði skv. aðalskipulagsbreytingu sem auglýst hefur verið samhliða. Gert er ráð fyrir gistingu fyrir allt að 100 gesti í allt að 50 gistihúsum, auk þjónustuhúss sem einnig er hugsað fyrir starfsmannaaðstöðu/íbúðir, verslun og sölu einfaldra veitinga. Einnig er heimilt er að gera baðlaug og aðra afþreyingu fyrir gesti. Heildarbyggingarmagn beggja lóða skal ekki fara yfir 2.000 m². Tillaga var auglýst frá og með 28.5.2026 til og með 15.7.2026. Umsagnir má skoða undir máli nr. 676/2026 í skipulagsgátt. Umsagnir bárust frá alls 7 aðilum. Athugasemdir bárust frá nærliggjandi lóðareigendum norðan Selsundslækjar. Lögð er fram samantekt á athugasemdum og ábendingum og drög að viðbrögðum við þeim.

Sveitarfélagið samþykkti 22.10.2025 að gerðar verði nauðsynlegar breytingar á aðalskipulagi sveitarfélagsins þar sem núverandi landnotkun landbúnaðarsvæðis verði breytt í Verslunar- og þjónustusvæði. Tillaga var auglýst frá og með 28.5.2026 til og með 15.7.2026. Umsagnir bárust frá alls 8 aðilum. Vegagerðin fer fram á að unnið verði að gerð samgöngumats vegna mikillar aukningar á umferð um svæðið. Athugasemdir bárust frá nærliggjandi lóðareigendum norðan Selsundslækjar. Lögð er fram samantekt á athugasemdum og ábendingum og drög að viðbrögðum við þeim.

Sveitarstjórn hefur samþykkt að gerð verði breyting á aðalskipulagi sveitarfélagsins þar sem fyrirhuguð vegtenging af Landvegi gegnum land Minni-Valla að Stóru-Völlum verði skilgreind.

Markmið breytingarinnar er að tryggja aðgengi að Stóru-Völlum í samræmi við fyrirliggjandi dómsátt um veginn og aðkomu að svæðinu. Í aðalskipulagi eru héraðsvegir og aðrir vegir almennt sýndir til skýringar og verður umrædd vegtenging færð inn með þeim hætti með breytingunni. Lögð er fram lýsing skipulagsáforma frá Eflu dags. 9.7.2026.

Fyrir liggur álit HMS um umhverfismat vegna stækkunar Sigöldustöðvar með tilliti til áhrifa á vatnshlot. Eftir framlagningu frekari gagna um áhrif á vatnshlot og opinbert samráð um þau er það mat HMS að áhrifin verði óveruleg og að framkvæmdin sé ekki líkleg til að leiða til þess að vatnshlot nái ekki umhverfismarkmiðum sínum.

Húsnæðis-, mannvirkja og skipulagsstofnun hefur óskað eftir umsögn þinni við mál í Skipulagsgátt, nr. 883/2026. Um er að ræða skógrækt og landgræðslu á um 415 ha svæði í landi Galtalækjar. Gert er ráð fyrir að planta í misstóra fláka sem dreifast jafnt yfir svæðið þannig að ekki verði um samfellda gróðursetningu að ræða og verður öll gróðursetning unnin handvirkt. Gert er ráð fyrir að planta birki á um 70% af heildarsvæðinu, stafafura á um 20-25% og elri á um 5-10% svæðisins.