Sameining sveitarfélaga - ósk um fund

Lagt fram erindi frá Hreppsnefnd Ásahrepps um að óska eftir fundi með sveitarstjórnum í Rangárvallasýslu til að ræða möguleika um sameiningar sveitarfélaga áður en að tekin verði ákvörðun um formlegar sameiningarviðræður.

Byggðarráð tekur vel í erindið og leggur til að fela sveitarstjóra og oddvita að ræða við Ásahrepp um að finna heppilegan fundartíma.

Samþykkt samhljóða.

Lagt fram erindi frá hreppsnefnd Ásahrepps þar sem óskað er eftir afstöðu sveitarstjórna Rangárþings ytra og Rangárþings eystra um að hefja formlegar viðræður þessara þriggja sveitarfélaga í Rangárvallasýslu um sameiningu.

Tekið stutt fundarhlé.

IPG, BG og EÞI tóku til máls.

Lagt til að hafna erindi Ásahrepps.

Samþykkt með fimm atkvæðum. EÞI og BG greiða atkvæði á móti.

Bókun Á-lista
Þann 26 september 2021 höfnuðu íbúar Ásahrepps með miklum meirihluta sameiningu fimm sveitarfélaga á Suðurlandi. Meðfylgjandi erindi Ásahrepps nú er niðurstaða úr skoðanakönnun sem framkvæmd var samhliða forsetakosningunum þann 1 júní s.l. Þar kemur fram að meirihluti íbúa Ásahrepps eða 56% þeirra sem afstöðu tóku eru ekki hlynntir því að sveitarfélagið sameinist öðru sveitarfélagi. Það er því mat undirritaðra að það sé ekki gott veganesti inn í sameiningarviðræður þessara sveitarfélaga. Staða sveitarfélagsins Ry er sterk og mikil uppbygging í gangi og álögur á íbúa hóflegar í samanburði við sambærileg sveitarfélög. Það er skoðun undirritaðra að það sé ekkert sem þrýsti á að Ry hefji formlegar sameiningarviðræður allra sveitarfélaganna í Rangárvallasýslu að svo stöddu. Sveitarfélögin þrjú í Rangárvallasýslu hafa um árabil átt í farsælu samstarfi um fjölmörg verkefni og fyrir það ber að þakka (EVG, MHG, VMÞ, ÞDÞ).

Bókun IPG:
Fyrir liggur erindi frá sveitarstjórn Ásahrepps um að hafnar verði sameiningarviðræður sveitarfélagana þriggja í Rangárvallasýslu. Í ljósi þess hve óafgerandi niðurstaða þeirra sem vilja sameinast við önnur sveitarfélög er, telur undirritaður ekki tímabært að hefja sameiningarviðræður allrar sýslunnar á þessu stigi.

Bókun EÞI og BG:
Það er skylda sveitarstjórnar að taka þátt í þeirri vinnu sem henni er falin og því ekki rétt að hafna beiðni um sameiningu. Því væri eðlilegra að gefa íbúum Rangárþings ytra færi á að taka afstöðu til málsins með því að kjósa um þennan sameiningarkost.