Endurnýjaður samstarfssamningur við KFR

Það voru þau Ágúst Sigurðsson sveitarstjóri Rangárþings ytra og Tinna Erlingsdóttir formaður KFR sem…
Það voru þau Ágúst Sigurðsson sveitarstjóri Rangárþings ytra og Tinna Erlingsdóttir formaður KFR sem undirrituðu samninginn.

Á dögunum var endurnýjaður samstarfssamningur við Knattspyrnufélag Rangæinga (KFR). KFR var stofnað 1997 og hefur það að markmiði að styrkja möguleika til knattspyrnuiðkunar í Rangárvallasýslu. Félagið heldur út æfingum fyrir yngri flokka auk þess sem meistaraflokkur félagsins hefur leikið á Íslandsmóti.

Samningnum er ætlað að efla samstarf milli sveitarstjórnar Rangárþings ytra og KFR og tryggja öflugt íþróttastarf fyrir börn og unglinga í sveitarfélaginu. Samningnum er ætlað að tryggja enn frekar starfsemi KFR enda er sveitarstjórn þeirrar skoðunar að það sinni öflugu og viðurkenndu forvarnarstarfi.

Samningurinn er árangurstengdur eftir fjölda virkra iðkenda í Rangárþingi ytra og geta því  árlegar greiðslur orðið á bilinu 2.150.000 – 3.000.000 kr. KFR fær einnig aðgang að öllum íþróttamannvirkjum sveitarfélagsins fyrir deild sína í samráði við forstöðumann íþróttamannvirkja sveitarfélagins. Samningurinn tekur við af eldri samning sem rann út í lok árs 2018.

Samninginn má nálgast hér. 

 

Fannst þér efnið á síðunni hjálplegt?