Leikskólinn á Laugalandi

Þriðjudaginn 6. febrúar, var dagur leikskólans haldinn hátíðlegur í leikskólanum á Laugalandi en 6. febrúar er merkisdagur í íslenskri leikskólasögu því þann dag árið 1950 stofnuðu frumkvöðlar leikskólakennara fyrstu samtök sín.

Dagur leikskólans er samstarfsverkefni Félags leikskólakennara, Félags stjórnenda leikskóla, mennta- og menningarmálaráðuneytis, Sambands íslenskra sveitarfélaga og Heimilis og skóla. Tilgangurinn er að auka jákvæða umræðu um leikskólann, vekja umræðu um hlutverk leikskóla og starf leikskólakennara og kynna starfsemina út á við.

Til að kynna starfsemi okkar út á við var ákveðið að bjóða ömmum og öfum nemenda í kaffi.  Börnin sýndu gestum sínum leikskólann sinn og einnig fengu þeir tækifæri til að perla, leira, lesa og leika sér.   Síðan var boðið upp á bollur sem þau höfðu bakað deginum á undan.  Mikil ánægja var með daginn og bíða afar og ömmur spennt eftir að fá að koma  aftur og sjá hvað barnabörnin eru að bralla í skólanum.  Að kynna leikskólastarfið á þennan hátt finnst okkur gaman en aðeins örfáir afar og ömmur hafa sjálf fengið tækifæri til að vera í leikskóla og því opnast fyrir þeim sá heimur sem barnabörnin lifa og hrærast í á daginn.  

 

Fannst þér efnið á síðunni hjálplegt?