Lið Byko sigrar Suðurlandsdeildina 2021

Suðurlandsdeildin í hestaíþróttum fór fram í Rangárhöllinni í vetur og var þetta fimmta tímabil sem keppt var í Suðurlandsdeild. Í ár voru 14 lið skráð til leiks og samtals 84 knapar, deildin er því sú stærsta á Íslandi. Það sem einkennir Suðurlandsdeildina er það að hvert lið er skipað atvinnu- og áhugamönnum sem mynda saman lið.

Eftir algjörlega magnaðan vetur þá lauk fimmta tímabili Suðurlandsdeildarinnar nú í gærkvöldi þar sem keppt var í tölti og skeiði. Það var lið Byko sem hlaut flest stig eftir veturinn en liðið halaði inn 371 stigi, í öðru sæti var lið Árbæjarhjáleigu/Hjarðartúns með 321 stig og Kvistir í því þriðja með 292 stig. Lið Smiðjunnar Brugghús og Húsasmiðjunnar komu þar rétt á eftir.

En í kvöld var keppt í skeiði og tölti. Það var lið Húsasmiðjunnar sem sigraði liðakeppni skeiðsins enda lentu liðsmenn þeirra í 1. Sæti í flokki atvinnumanna og 3. Sæti í flokki áhugamanna. Í flokki áhugamanna var það Aasa Ljungberg á Rangá frá Torfunesi sem fór hraðast á tímanum 8,21 sek, Aasa keppir fyrir lið Vöðla/Snilldarverks/Sumarliðabæjar. Í flokki áhugamanna var það Sigursteinn Sumarliðason á Krókus frá Dalbæ sem fór hraðast á tímanum 7,76 sek, Sigursteinn keppir fyrir lið Húsasmiðjunnar.

Efstu sex í hvorum flokki fyrir sig má sjá hér að neðan:

Úrslit atvinnumanna

Úrslit áhugamanna

Í tölti voru mörg gríðarlega sterk hross skráð til leiks og úrslitin eftir því! Lið Árbæjarhjáleigu/Hjarðartúns sigraði liðakeppni tölts en liðsmenn þeirra lentu í 2. og 4. Sæti í flokki atvinnumanna og 9. og 15. Í flokki áhugamanna. Í flokki áhugamanna var það Elín Hrönn Sigurðardóttir á Dáð frá Feti sem sigraði með einkunnina 7,17, Elín keppir fyrir lið Fet/Þverholts. Í flokki atvinnumanna var það Lea Schell á Silfá frá Húsatóftum 2a sem stóð efst með einkunnina 7,94, Lea keppir fyrir lið Krappa.

Efstu sex í hvorum flokki fyrir sig má sjá hér að neðan:

Úrslit atvinnumanna

Úrslit áhugamanna

Öll nánari úrslit má nálgast í Kappa appinu (LH Kappi).

Við viljum þakka þeim fjölmörgu styrktaraðilum sem studdu keppnina í vetur fyrir sinn stuðning, einnig viljum við þakka liðum fyrir frábæra samvinnu og Alendis TV fyrir að streyma þessu öllu til alheimsins!

Sjáumst fersk að ári!

Takk fyrir okkur