Melaskógur vex og dafnar

Melaskógur er falin náttúruperla í útjaðri Hellu. Þar hafa nemendur Grunnskólans á Hellu gróðursett trjáplöntur árlega frá árinu 1996.

Skógurinn stækkar ár frá ári og nú er þarna upp vaxinn myndarlegur skógur sem er frábær til útivistar. Hann er einnig í næsta nágrenni við Aldamótaskóginn sem er sunnan þjóðvegar.

Við mælum með að lesa frétt skólans um trjáplöntun ársins og skoða myndirnar sem fylgja með því að smella hér.

Gaman er að rölta um skóginn og skoða þann fjölda tegunda sem þar þrífst. Af trjátegundum má finna aspir, birki, greni og furu sem hefur verið plantað en einnig sjálfsáðar víðitegundir eins og gul- og grávíði.

Í Melaskógi má einnig finna bláberja- og krækiberjalyng, hundasúrur, vallhumal, fífla og ýmislegt fleira.