Fréttir

Laugalandsskóli í Holtum í Rangárþingi ytra hlaut Menntaverðlaun Suðurlands 2012 fyrir framúrskarandi kennslu í framsögn og framkomu og afar góðan árangur í lestrarkeppnum undanfarinna ára. Forseti Íslands afhenti verðlaunin í síðustu viku í tengslum við hátíðarfund Fræðslunets Suðurlands.

Sjötti febrúar er „Dagur leikskólans“, en þann dag árið 1950 stofnuðu frumkvöðlar leikskólakennara fyrstu samtök sín. Dagur leikskólans er samstarfsverkefni Félags leikskólakennara, mennta- og menningar málaráðuneytis, Sambands íslenskra sveitarfélaga og Heimilis og skóla. Mikil ánægja hefur verið með daginn og hafa gestir notið þess að sjá og kynnast því umhverfi sem börnin eru í á daginn. 

Elstu börnin á leikskólanum Heklukoti komu í heimsókn í Miðjuna í gær og fengu að hengja upp myndir í tengslum við umhverfisverkefni sem þau eru að vinna að. Þau fá markvissa fræðslu í umhverfismennt einu sinni í viku og hafa þau haft í nægu að snúast í allan vetur.

Framkvæmdasjóður ferðamannastaða auglýsir eftir umsóknum um styrki til uppbyggingar á ferðamannastöðum fyrir árið 2013. Umsóknarfrestur er til og með 1. mars 2013 og umsóknir sem berast eftir það eru ekki teknar gildar.

Þorrablótið á Hellu verður haldið laugardaginn 16. febrúar næstkomandi. Hljómsveitin "Síðasti sjens" leikur fyrir dansi eitthvað fram á nótt. Skemmtiatriðin verða á sínum stað en einnig munu félagar úr Harmonikkufélagi Rangæinga taka lagið. Miðasala fer fram í íþróttarhúsinu á Hellu laugardaginn 9. febrúar kl. 10.00 - 14.00.

Ánægjuvogin er könnun sem UMFÍ og ÍSÍ stóðu að í sameiningu á stöðu íþróttastarfs, ánægju iðkenda, stöðu áfengis og tóbaksnotkunar og fleira meðal sambandsaðila í 8.-10.bekk. Mánudaginn 4.febrúar munu UMFÍ og ÍSÍ standa í sameiningu fyrir fundi á Selfossi í Tíbrá Engjavegi 50 og hefst fundurinn klukkan 17:00.

Meistaraflokkur karla í körfubolta Ungmennafélagsins Heklu leikur við Smára frá Skagafirði en leikurinn fer fram þriðjudaginn 5. febrúar kl. 20:00 í íþróttahúsinu á Hellu. Hekla vann síðasta leik á móti Patrek frá Patreksfirði sl. miðvikudag eftir framlenginu og "það var æðislegt að heyra stemninguna í húsinu undir lokin" að sögn Heklumanna.

Fundir með hverfum vegna nágrannavörslu á Hellu voru vel sóttir í gær og í kjölfarið er ætlun að koma á fót nágrannavörslu í þeim hverfum sem sóttu fundina. Á næstunni ætla íbúar umræddra hverfa að ganga í hús hjá þeim sem mættu ekki og kynna verkefnið og hvetja til þátttöku.

Ný skipulagsreglugerð hefur tekið gildi en hún er sett á grundvelli skipulagslaga sem samþykkt voru á Alþingi haustið 2010. Meðal nýmæla í reglugerðinni eru þau að gerð er  breyting á landnotkunarflokkum en þeir fela í sér skilgreiningu á ráðstöfun lands til mismunandi nota.

Sveitarfélagið Rangárþing ytra fékk í gær úthlutað tveimur þriggja milljóna króna styrkjum úr Framkvæmdasjóði ferðamannastaða (2. úthlutun) en umsóknargögnin voru send inn í september 2012. Alls fengu 44 verkefni styrk að þessu sinni og nam heildarstyrkupphæðin rúmlega 150 milljónum króna.