Fréttir

43. fundur hreppsnefndar Rangárþings ytra, á kjörtímabilinu 2010 - 2014, verður haldinn að Suðurlandsvegi 3 á Hellu, föstudaginn 1. febrúar 2013, kl. 13.00.

Til stendur að koma á fót nágrannavörslu á Hellu ef áhugi íbúa er fyrir hendi. Fundir verða haldnir í Grunnskólanum á Hellu og munu taka um eina og hálfa klukkustund. Skipt verður niður eftir litahverfum. Gula og rauða hverfið kl. 17.30  og græna hverfið kl. 19.30 á fimmtudaginn 31. janúar og fyrirtæki og stofnanir og bláa hverfið funda þann 7. febrúar.

Knattspyrnufélag Rangæinga og sveitarfélagið Rangárþing ytra gengu í dag frá þjónustusamningi sín á milli vegna útbreiðslu knattspyrnu í íþróttastarfi í samræmi við ákvörðun sveitarstjórnar á 37. fundi hennar árið 2012. Þjónustusamningi þessum er m.a. ætlað að efla samstarf milli sveitarstjórnar Rangárþings ytra og Knattspyrnufélags Rangæinga.

Meistaraflokkur karla í körfubolta Ungmennafélagsins Heklu leikur við Patrek frá Patreksfirði. Leikurinn fer fram miðvikudaginn 30.janúar kl. 20:00 í íþróttahúsinu á Hellu. Hekla hefur unnið 3 leiki og tapað 4 á þessu tímabili og er allur stuðningur á hliðarlínunni er vel þeginn að sögn forsvarsmanna Heklu.

Evrópustofa, upplýsingamiðstöð ESB á Íslandi efnir til opins fundar um Evrópumál á Hótel Hvolsvelli, miðvikudaginn 30. janúar kl. 20:00-21:00 og eru allir velkomnir. Á fundinum mun sendiherra ESB á Íslandi, Timo Summa, ræða um stöðuna innan Evrópusambandsins og gang mála í aðildarviðræðum sambandsins við Ísland. Sendiherrann talar á ensku en boðið verður upp á endursögn á íslensku.

Líkamsræktarstöðin Actic á Hellu býður nú árskort á kr. 25.990,- og gildir það einnig sem árskort í Sundlaug Hellu. Tilboðið gildir til 11. febrúar næstkomandi. Einnig er minnt á það að börn og unglingar að 18 ára aldri þurfa ekki að greiða aðgangseyri í sund í sveitarfélaginu samkvæmt nýrri gjaldskrá.

Fyrirhugað er að halda leiklistarnámskeið fyrir krakkana í 5.-10. bekk, bæði frá Grunnskólanum á Hellu og Laugalandsskóla. Námskeiðið hefst þann 28. janúar n.k og verður frá kl. 17 – 19 í Menningarsalnum á Hellu. Þá fer einnig fram skráning og kynning á námskeiðinu. Reiknað er með 10 skiptum og er gjald 4.000 kr. pr. barn.

Gámakó ehf., hefur nú gefið út nýtt sorphirðudagatal fyrir árið 2013. Unnið er frá Þjórsá annan hvern mánudag og austur eftir svæðinu. Hægt er að skoða allar upplýsingar á undirsíðunni "Sorphreinsun og sorpeyðing" sem er staðsett undir málaflokknum "Hreinlætismál". Einnig er þar nýútgefinn bæklingur um landbúnaðarplast.

28. fundur hreppsráðs Rangárþings ytra, á kjörtímabilinu 2010 - 2014, verður haldinn að Suðurlandsvegi 3, Hellu, föstudaginn 18. janúar 2013 kl. 09:00.

Íbúafundur verður haldinn í íþróttahúsinu á Hellu 24. janúar n.k. kl. 20.00. Á fundinum verða kynntar hugmyndir um nágrannavörslu ásamt kynningu á fjárhagsáætlun 2013-2016. Að loknum þessum liðum verða umræður og fyrirspurnir um framangreinda liði og önnur málefni sveitarfélagsins.