Skipulags- og umferðarnefnd Rangárþings ytra

Óðinn Pálsson óskar eftir landskiptum úr jörð sinni Stóru-Völlum landnr. 165011. Um er að ræða spildu ca 3,0 ha að stærð og er afmörkuð skv. uppdrætti frá Loftmyndum ehf. Ný lóð fær nafnið Stóru-Vellir 5.

Sveitarstjórn Flóahrepps hefur hafið vinnu við endurskoðun aðalskipulags sveitarfélagsins. Í dag eru í gildi þrjár aðalskipulagsáætlanir sem hver og ein nær yfir eitt af þremur sveitarfélögunum sem sameinuðust í Flóahrepp árið 2006, þ.e. Hraungerðishrepp, Gaulverjabæjarhrepp og Villingaholtshrepp, en með nýju aðalskipulagi verða svæðin sameinuð í eitt skipulag sem nær yfir allt land sveitarfélagsins. Óskað er eftir umsögn um meðfylgjandi verkefnislýsingu.

Sveitarstjórn Rangárþings ytra hefur samþykkt að gera breytingar á afmörkun vatnsverndarsvæðis ofan við Keldur á Rangárvöllum. Samráð hefur verið haft við Rangárþing eystra og liggur nú fyrir skýrsla frá ÍSOR þar sem nýjar áherslur eru lagðar fram. Samkvæmt fyrirliggjandi skýrslu er lagt til að fjarsvæði vatnsverndar fyrir Krappa nái inná það svæði sem áður var lagt til að yrði afmáð sem vatnsverndarsvæði þannig að fyrirhuguð minnkun vatnsverndar ofan við Keldur yrði ekki eins mikil og lagt var af stað með í upphafi. Ný tillaga ÍSOR um afmörkun hefur þó ekki áhrif á minnkun grannsvæðis ofan við Keldur.

Þór Þorsteinsson óskar eftir heimild sveitarstjórnar til að fá að deiliskipuleggja svæði undir alifuglahús. Til stendur að byggja eldishús fyrir kjúklinga sem á að geta annað allt að 60.000 fuglum og verði um 3.500 m² að stærð. Að kröfu Vatnsveitu Rangárþings ytra og Ásahrepps var ferilefnarannsókn sett af stað á vegum ÍSOR til að meta grunnvatnsrennsli á svæðinu m.t.t. mengunarhættu frá áformuðum rekstri alifuglahússins. Fyrir liggur álit frá fundi stjórnar Vatnsveitunnar um fyrirhuguð áform umsækjanda.

Guðmundur Björnsson hefur fengið heimild til að gera breytingar á gildandi deiliskipulagi frá 7.6.2013 fyrir Heysholt. Í stað lóðar undir þyrpingu frístundahúsa og lóðar undir þjónustuhús verða þær lóðir sameinaðar í eina þar sem gert er ráð fyrir 2-3ja hæða hótelbyggingu. Í yfirferð Skipulagsstofnunar komu fram athugasemdir og ábendingar sem kalla á umfjöllun og lagfæringar. Einnig kom fram að umrædd framkvæmd sé tilkynningaskyld skv. lið 12.05, B-flokkki í 1. viðauka laga um mat á umhverfisáhrifum. Fyrir liggur umhverfismat.

Rangárþing ytra vinnur að gerð deiliskipulags fyrir Landmannalaugar. Fyrir liggur lýsing skipulagsáætlunar.

Framkvæmdahópur á vegum Kaupfélags Skagfirðinga leggur fram tillögu að breytingu á gildandi deiliskipulagi fyrir þjónustusvæði við Rangárbakka á Hellu. Í tillögunni felst að deiliskipulagssvæðið stækkar til suðurs. Lóðirnar Rangárbakki 1,3,5 og 11 eru sameinaðar í eina lóð. Lóðirnar eru í dag skilgreindar sem athafnalóðir auk þess er ein lóð skilgreind sem iðnaðarlóð. Deiliskipulagsbreytingin gerir ráð fyrir að sameinuð lóð verði skilgreind sem verslunar- og þjónustulóð. Afmarkaðir eru þrír byggingareitir fyrir verslun- og þjónustubyggingar á lóðinni. Einnig eru afmarkaðir byggingareitir fyrir 40 frístundahús, þjónustuhús fyrir frístundahús auk byggingareits fyrir sjálfsafgreiðslu eldsneytisstöð.
Gert er ráð fyrir a.m.k. einu bílastæði pr. 50 m².

Landeigendur Fagurhóls óska eftir heimild til að gera breytingar á gildandi deiliskipulagi fyrir Fagurhól frá 14.10.2014. Fyrir liggur tillaga sem felur í sér nýja aðkomu að Fagurhóli frá Árbæjarvegi í stað núverandi sameiginlegrar aðkomu Fagurhóls og Grásteins.

Oddsteinn Magnússon óskar eftir heimild til að deiliskipuleggja hluta úr landi Uxahryggjar til uppbyggingar fyrir ferðaþjónustu ásamt því að sett verði fram áform um byggingu íbúðarhúss og fl.

Guðmundur Á. Ingvarsson óskar eftir að fá að flytja lögheimili sitt á land sitt, Hagi lóð 165215 við Gíslholtsvatn. Skoðun á mannvirki hefur farið fram og uppfyllir húsnæði öll skilyrði um íbúð. Landið er skilgreint sem frístundasvæði í aðalskipulagi Rangárþings ytra 2010-2022 en hefur ekki verið deiliskipulagt. Byggðaráð gerði ekki athugasemdir við áform umsækjanda og samþykkti á fundi dags. 27.6.2016 að heimila breytingar á landnotkun í aðalskipulagi Rangárþings ytra 2010-2022.

Al-Hönnun ehf, fyrir hönd fyrirspyrjenda, óskar eftir áliti sveitarstjórnar á því hvort mögulega geti orðið um breytta notkun að ræða á húsnæðinu Hellubíó, þar sem áformað er að breyta notkun þess í gistiheimili / hostel fyrir ferðamenn. Gert yrði ráð fyrir allt að 12-14 herbergjum með sameiginlegri salernis- og sturtuaðstöðu og aðgangi að fullbúna eldhúsi fyrir gesti. Ekki yrði um veitingasölu að ræða. Erindið tekið upp aftur vegna frestunar í fyrri afgreiðslu. Teikningar lagðar fram til glöggvunar.

Bæring Jón Guðmundsson fyrir hönd ábúenda á Saurbæ hefur óskað eftir aðgerðum til að sporna við hraðakstri í gegnum bæjarhlaðið að Saurbæ. Skipulagsfulltrúi hefur fundað með forsvarsmönnum Vegagerðarinnar um þetta mál.

Kristín Bjarnadóttir, íbúi að Stóra Rimakoti, hefur óskað eftir að sett verði hraðahindrun sitt hvoru megin við íbúðarhús sitt. Skipulagsfulltrúi átti fund með forsvarsmönnum Vegagerðarinnar vegna þessa erindis.

Kristín Bjarnadóttir fyrir hönd nokkurra hestamanna í Þykkvabæ hefur óskað eftir framkvæmdaleyfi til lagningar reiðvegar meðfram veginum á milli Austurbæja í Þykkvabæ. Afgreiðsla sveitarstjórnar var á þá leið að kalla þyrfti eftir samþykktum allra viðkomandi landeigenda ásamt því að staðfesting vegagerðarinnar þyrfti að liggja fyrir vegna þverana vegar. Skipulagsfulltrúi átti fund með forsvarsmönnum Vegagerðarinnar vegna þessa erindis.