Umhverfis-, hálendis- og samgöngunefnd

Loftgæðamælar sem mæla gös og svifagnir í andrúmslofti eru misdreifðir um landið, en langflestir þeirra eru á suðvestur horni landsins. Sérstaklega er áberandi að enginn slíkur er á svæðinu frá Selfossi að Kirkjubæjarklaustri og svo ekki fyrr en á Reyðarfirði. Engin vöktun er á þessum efnum og þar af leiðandi engin gögn til um þau. En væri vöktun í gangi, væri hægt að gefa út viðvaranir til almennings ef ástandið væri slæmt. Á þessu víðfeðma eldvirka svæði eru fjölmörg virk eldfjöll og hefur reynsla síðustu gosa á Reykjanesi sýnt að slíkt tengist mjög slæmum loftgæðum annaðhvort í eldgosum eða vegna svifryks sem þau hafa búið til.

Farið yfir stöðu vinnu við umhverfisstefnu Rangárþings ytra ásamt loftslagsstefnu og auðlindastefnu.

Umhverfisstofnun vekur athygli á því að stofnunin hefur lagt fram áform um að veita heimild skv. 18 gr. laga um stjórn vatnamála vegna breytingar á vatnshlotinu Þjórsá 1, vegna framkvæmda við 95 MW Hvammsvirkjun.

Landsvirkjun hefur lagt fram umhverfisskýrslu vegna stækkunar Sigöldustöðvar. Meðfylgjandi er álit Skipulagsstofnunar vegna ofangreindrar framkvæmdar skv. lögum nr. 111/2021 um umhverfismat framkvæmda og áætlana.

Eigandi Gaddstaðaeyjar hefur fengið heimild til að leggja fram deiliskipulag af uppbyggingu í eyjunni. Um er að ræða byggingu brúar út í eyjuna sem þolir bílaumferð og umferð gangandi fólks. Fyrirhugað er að hafa íbúðabyggð norðan til á eyjunni, fyrir allt að 12 einbýlishús og sunnan til er gert ráð fyrir hóteli með afþreyingu s.s. baðlóni, fyrir allt að 200 gesti. Einnig er möguleiki á útivistarsvæði syðst á eynni. Gert er ráð fyrir að gerð verði breyting á aðalskipulagi þar sem núverandi óbyggðu svæði verði breytt í íbúðarsvæði að hluta og hins vegar í verslunar- og þjónustusvæði. Lögð er fram lýsing skipulagsáforma frá Eflu dags. 26.10.2023.

Sveitarfélagið hefur unnið að hugmyndavinnu vegna nýs íbúðarhverfis í Bjargshverfi. Gert verði ráð fyrir allt að 100 íbúðareiningum í mismunandi tegundum húsa, einbýlis, par- og raðhúsum. Gerð verði grein fyrir tengingum við aðra vegi og samgöngum innan svæðisins. Tengsl við þéttbýlið austan Ytri-Rangár gerð skil með áformuðum göngubrúm og göngustígum. Lögð er fram lýsing skipulagsáforma frá Basalt arkitektum dags. 30.11.2023.

Skýrsla vegna rannsókna á áhrifum hlýnunar á hélumosavist innan friðlands að Fjallabaki 2021 til 2023

Vegagerðin hefur óskað eftir framkvæmdaleyfi til að endurbyggja Þingskálaveg milli slitlagsenda frá Heiði að Örlygsstaðamelum. Fyrirhugað er að endurbyggja veginn og leggja á hann bundið slitlag á um 7,5 km kafla. Jafnframt er fyrirhugað að færa veginn að hluta við Heiðarlæk og setja nýtt stálræsi þar í nýrri veglínu. Skipt verður um nokkur önnur ræsi á framkvæmdasvæðinu og önnur lagfærð þar sem það á við. Umsókn barst 13.10.2023. Sveitarstjórn á fundi sínum 8.11. sl samþykkti veitingu framkvæmdaleyfis. Framkvæmdin er háð tilkynningu til Skipulagsstofnunar og meðfylgjandi er ákvörðun Skipulagsstofnunar þess efnis að umrædd framkvæmd skuli ekki háð mati á umhverfisáhrifum.